ملاحظة: التدوينة بالعامية المصرية.
بتستفادوا إيه لما تكسروا اللي قصادكو؟
لما تعرّوه من القوة والابتسامة اللي هو ساتر بيها ضعفه؟
ما تسيبوا اللي اتجوزت واتطلقت من غير ما تقترحوا عليها إنها كانت تستحمل، وإن ولادها محتاحين أب، وإنهم كده هيتأذوا؛ لأنها أكيد عارفة كل كلامكو ده، ومع كده ما قدرتش تكمل!
سيبوا اللي كبرت وما اتجوزتش من غير ما كل سنة تفكروها إنه سنها عدى التلاتين! أصلها مش قاعدة فوق دماغكو، وبعدين هي أكيد عارفة إنها ما اتجوزتش، والأكيد برضه إنها عارفة سنها، مش مستنياكو تقولولها!
سيبوا اللي قلعت الحجاب من غير ما تحتلوا مكان الخالق وتقرروا لها إنها هتروح النار!
سيبوا اللي اتجوز جواز صالونات وراضي وفرحان من غير ما تقرفوه، بأنه غلطان وهيندم، وإنه لازم يحب الأول!
سيبوا اللي ما خلّفوش من غير ما تقترحوا عليهم إنهم يروحوا للدكتور الفلاني، لأنهم أكيد حاولوا وراحوا لمليون دكتور مش مستنيين اقتراحكو العبقري!
سيبوا اللي ساب شغله، واللي اتطلقت، واللي خلفت بنات بس، واللي جوزها بيخونها ومكملة، واللي ما بيحبوش بعض ومكملين، واللي بيضحك من همه، واللي أمه ماتت وخرج، واللي جوزها مات ولبست ملون.. سيبوهم في حالهم من غير ما توجعوهم.. همّا مش ناقصين.. سيبوا كل واحد عارف إنه ناقصه حاجة، وبالرغم من كده متداري في ابتسامة، سيبوه من غير ما تاخدوها منه.
خلونا نسيب بعض في حالنا.. بلاش نكسر بعض.. بلاش نجبر حد مخبي دموعه يبكي قصادنا.. بلاش.
كل واحد فينا عارف إيه اللي ناقصه، وإيه اللي عايزه، وإيه اللي رافضه، وإيه اللي نفسه فيه، مش لازم بقى إحنا نقولها له.
بلاش نشيل غلاف “أنا تمام” من على بعض.. ما لهاش أي لازمة والله.
لو مش عارف تكون سند وقوة لحد، يبقى ع الأقل ما تكُنش ضعفه وكسرته ووجعه.
ملحوظة:
التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.